15 સપ્ટેમ્બર, (SportsMirror.in), મુંબઇ : ભારતીય ટીમે વેસ્ટ ઇન્ડિઝને 2 ટેસ્ટની સીરીઝ 2-0 થી જીતી લઇને ઘર આંગણે સતત 10 ટેસ્ટ સીરીઝ જીતવાનો રેકોર્ડ નોંધાવ્યો છે. તો આ સીરીઝમાં મુંબઇના યુવા બેટ્સમેન Prithvi Shaw એ ભારતીય ટીમમાં ડેબ્યુ કર્યું હતું. પોતાની પહેલી જ ટેસ્ટમાં સદી અને બીજી ટેસ્ટમાં અડધી સદી ફટકારીને પૃથ્વીએ શાનદાર પ્રદર્શન કરીને તમામને પોતાની તરફ આકર્ષ્યા હતા. આમ પૃથ્વી શો “મેન ઓફ ધ સીરિઝ” જાહેર થયો હતો. પૃથ્વી શોએ બીજી ટેસ્ટમાં વિજયી શોટ લગાવતાની સાથે જ એક અનોખો રેકોર્ડ પોતાના નામે કર્યો હતો.
બે મેચની ટેસ્ટ શ્રેણીમાં પૃથ્વીએ 118.50ની એવરેજથી 237 રન બનાવ્યા હતા. વેસ્ટ ઇન્ડીઝ સામે 134, 70 અને અણનમ 33 રનની ઇનિંગ્સ રમી શો એ સાબિત કરી દીધું છે કે તે લાંબી રેસનો ઘોડો છે.
પૃથ્વી શોના નામે રહ્યા આ રેકોર્ડસ
વેસ્ટ ઇન્ડીઝ સામે ડેબ્યુ ટેસ્ટમાં મેન ઓફ ધ સિરીઝનો એવોર્ડ મેળવનાર પૃથ્વી શો ત્રીજો ભારતીય ક્રિકેટર બન્યો છે. આ પહેલા 2011માં અશ્વિન અને 2013માં રોહિત શર્માએ આવી સિદ્ધિ મેળવી હતી. ખાસ વાત એ છે કે ત્રણેય વખત ભારતે 2-0થી શ્રેણી જીતી હતી.
તો ભારતનો સૌરવ ગાંગુલી પણ ડેબ્યુ ટેસ્ટમાં મેન ઓફ ધ સિરીઝ બન્યો હતો. ગાંગુલીએ 1996માં ઇંગ્લેન્ડ સામે આ સિદ્ધિ મેળવી હતી. તે સમયે ગાંગુલી ડેબ્યુ ટેસ્ટમાં મેન ઓફ ધ સિરીઝ બનનાર વર્લ્ડનો પ્રથમ બેટ્સમેન બન્યો હતો.
